Chandakanivartano nāma ṣaṣṭhaḥ sargaḥ
Technical Details
CANTO VI
tato muhūrtābhyudite
jagaccakṣuṣi bhāskare|
bhārgavasyāśramapadaṃ
sa dadarśa nṛṇāṃ varaḥ||1||
suptaviśvastahariṇaṃ
svasthasthitavihaṅgamam|
viśrānta iva yaddṛṣṭvā
kṛtārtha iva cābhavat||2||
sa vismayanivṛttyartha
tapaḥpūjārthameva ca|
svāṃ cānuvartitā rakṣa-
nnaśvapṛṣṭhādavatārat||3||
avatīrya ca pasparśa
nistīrṇamiti vājinam|
chandakaṃ cāvravītprītaḥ
snāpayanniva cakṣuṣā||4||
imaṃ tārkṣyopamajavaṃ
turaṅgamanugacchatā|
darśitā saumya madbhakti-
rvikramaścāyamātmanaḥ||5||
sarvathāsmyanyakāryo'pi
gṛhīto bhavatā hṛdi|
bhartusnehaśca yasyāya-
mīdṛśaḥ śaktireva ca||6||
asnigdho'pi samartho'sti
niḥsāmarthyo'pi bhaktimān|
bhaktimāṃścaiva śaktaśca
durlabhastvadvidho bhuvi||7||
tatprīto'smi tavānena
mahābhāgena karmaṇā|
yasya te mayi bhāvo'yaṃ
phalebhyo'pi parāṅmukhaḥ||8||
ko janasya phalasthasya
na syādabhimukho janaḥ|
janībhavati bhūyiṣṭhaṃ
svajano'pi viparyaye||9||
kulārtha dhāryate putraḥ
poṣārtha sevyate pitā|
āśayācchilaṣyati jaga-
nnāsti niṣkāraṇā svatā||10||
kimuktvā bahu saṃkṣepā-
tkṛtaṃ me sumahatpriyam|
nivartasvāśvamādāya
saṃprāpto'smīpsitaṃ padam||11||
ityuktvā sa mahābāhu-
ranuśaṃsacikīrṣayā|
bhūṣaṇānyavamucyāsmai
saṃtaptamanase dadau||12||
mukuṭāddīpakarmāṇaṃ
maṇīmādāya bhāsvaram|
bruvanvākyamidaṃ tasthau
sāṃditya iva mandaraḥ||13||
anena maṇinā chanda
praṇamya bahuśo nṛpaḥ|
vijñāpyo'muktaviśrambhaṃ
saṃtāpavinivṛttaye||14||
janmamaraṇanāśārtha
praviṣṭo'smi tapovanam|
na khalu svargatarṣeṇa
nāsnehena na manyunā||15||
tadevamabhiniṣkrāntaṃ
na māṃ śocitumarhasi|
bhūtvāpi hi ciraṃ śleṣaḥ
kālena na bhaviṣyati||16||
dhruvo yasmācca viśleṣa-
stasmānmokṣāya me matiḥ|
viprayogaḥ kathaṃ na syād
bhūyo'pi svajanāditi||17||
śokatyāgāya niṣkrāntaṃ
na māṃ śocitumarhasi|
śokahetuṣu kāmeṣu
saktāḥ śocyāstu rāgiṇaḥ||18||
ayaṃ ca kila pūrveṣā-
masmākaṃ niścayaḥ sthiraḥ|
iti dāyādyabhūtena
na śocyo'smi pathā vrajan||19||
bhavanti hyarthadāyādāḥ
puruṣasya viparyaye|
pṛthivyāṃ dharmadāyādāḥ
durlabhāstu na santi vā||20||
yadapi syādasamaye
yāto vanamasāviti|
akālo nāsti dharmasya
jīvite cañcale sati||21||
tasmādadyaiva me śreya-
ścetavyamiti niścayaḥ|
jīvite ko hi viśrambho
mṛtyau pratyarthini sthite||22||
evamādi tvayā saumya
vijñāpyo vasudhādhipaḥ|
prayatethāstathā caiva
yathā māṃ na smaredāpi||23||
api nairguṇyamasmākaṃ
vācyaṃ narapatau tvayā|
nairguṇyāttyajyate snehaḥ
snehatyāgānna śocyate||24||
iti vākyamidaṃ śrutvā
chandaḥ saṃtāpaviklavaḥ|
bāṣpagrathitayā vācā
pratyuvāca kṛtāñjaliḥ||25||
anena ta va bhāvena
bāndhavāyāsadāyinā|
bhartaḥ sīdati me ceto
nadīpaṅka iva dvipaḥ||26||
kasya notpādayedbāṣpaṃ
niścayaste'yamīdṛśaḥ|
ayomaye'pi hṛdaye
kiṃ punaḥ snehaviklave||27||
vimānaśayanārhaṃ hi
saukumāryamidaṃ kva ca|
kharadarbhāṅkuravatī
tapovanamahī kva ca||28||
śrutvā tu vyavasāyaṃ te
yadaśvo'yaṃ mayāhṛtaḥ|
balātkāreṇa tannātha
daivenaivāsmi kāritaḥ||29||
kathaṃ hyātmavaśo jānan
vyavasāyamimaṃ tava|
upānayeyaṃ turagaṃ
śokaṃ kapilavāstunaḥ||30||
tannārhasi mahābāho
vihātuṃ putralālasam|
snigdhaṃ vṛddhaṃ ca rājānaṃ
saddharmamiva nāstikaḥ||31||
saṃvardhanapariśrāntāṃ
dvitīyāṃ tāṃ ca mātaram|
devīṃ nārhasi vismartu
kṛtaghna iva satkriyām||32||
bālaputrāṃ guṇavartī
kulaślādhyāṃ pativratām|
devīmarhasi na tyaktuṃ
klībaḥ prāptāmiva śriyam||33||
putraṃ yāśodharaṃ ślādhyaṃ
yaśodharmabhṛtāṃ varam|
bālamarhasi na tyaktuṃ
vyasanīvottamaṃ yaśaḥ||34||
atha bandhuṃ ca rājyaṃ ca
tyaktumeva kṛtā matiḥ|
māṃ nārhasi vibho tyaktuṃ
tvatpādau hi gatirmama||35||
nāsmi yātuṃ puraṃ śakto
dahyamānena cetasā|
tvāmaraṇye parityajya
sumantra iva rāghavam||36||
kiṃ hi vakṣyati māṃ rājā
tvadṛte nagaraṃ gatam|
vakṣyāmyucitadarśitvā-
tkiṃ tavāntaḥpurāṇi vā||37||
yadapyātthāpi nairguṇyaṃ
vācyaṃ narapatāviti|
kiṃ tadvakṣyāmyabhūtaṃ te
nirdoṣasya muneriva||38||
hṛdayena salajjena
jivhayā sajjamānayā|
ahaṃ yadapi vā brūyāṃ
kastacchraddhātumarhati||39||
yo hi candramasastaikṣṇyaṃ
kathayecchraddadhīta vā|
sa doṣāṃstava doṣajña
kathayecchraddadhīta vā||40||
sānukrośasya satataṃ
nityaṃ karuṇavedinaḥ|
snigdhatyāgo na sadṛśo
nivartasva prasīda me||41||
iti śokābhibhūtasya
śrutvā chandasya bhāṣitam|
svasthaḥ paramayā dhṛtyā
jagāda vadatāṃ varaḥ||42||
madviyogaṃ prati cchanda
saṃtāpastyajyatāmayam|
nānābhāvo hi niyataṃ
pṛthagjātiṣu dehiṣu||43||
svajanaṃ yadyapi snehā-
nna tyajeyamahaṃ svayam|
mṛtyuranyonyamavaśā-
nasmān saṃtyājayiṣyati||44||
mahatyā tṛṣṇayā duḥkhai-
rgarbheṇāsmi yayā dhṛtaḥ|
tasyā niṣphalayatnāyāḥ
kvāhaṃ mātuḥ kva sā mama||45||
vāsavṛkṣe samāgamya
vigacchanti yathāṇḍajāḥ|
niyataṃ viprayogānta-
stathā bhūtasamāgamaḥ||46||
sametya ca yathā bhūyo
vyapayānti balāhakāḥ|
saṃyogo viprayogaśca
tathā me prāṇināṃ mataḥ||47||
yasmādyāti ca loko'yaṃ
vipralabhya paraṃparam|
mamattvaṃ na kṣamaṃ tasmā-
tsvapnabhūte samāgame||48||
sahajena viyujyante
parṇarāgeṇa pādapāḥ|
anyenānyasya viśleṣaḥ
kiṃ punarna bhaviṣyati||49||
tadevaṃ sati saṃtāpaṃ
mā kārṣī saumya gamyatām|
lambate yadi tu sneho
gatvāpi punarāvraja||50||
brūyāścāsmatkṛtāpekṣaṃ
janaṃ kapilavāstuni|
tyajyatāṃ tagdataḥ snehaḥ|
śrūyatāṃ cāsya niścayaḥ||51||
kṣiprameṣyati vā kṛtvā
janmamṛtyukṣayaṃ kila|
akṛtārtho nirārambho
nidhanaṃ yāsyatīti vā||52||
iti tasya vacaḥ śrutvā
kanthakasturagottamaḥ|
jivhayā lilihe pādau
bāṣpamuṣṇaṃ mumoca ca||53||
jālinā svastikāṅkena
cakramadhyena pāṇinā|
āmamarśa kumārastaṃ
babhāṣe ca vayasyavat||54||
muñca kanthaka mā bāṣpaṃ
darśiteyaṃ sadaśvatā|
mṛṣyatāṃ saphalaḥ śīghraṃ
śramaste'yaṃ bhaviṣyati||55||
maṇitsaruṃ chandakahastasaṃsthaṃ
tataḥ sa dhīro niśitaṃ gṛhītvā
kośādasiṃ kañcanabhakticitraṃ
bilādivaśīviṣamudbabarha||56||
niṣkāsya taṃ cotpalapattranīlaṃ
ciccheda citraṃ mukuṭaṃ sakeśam|
vikīryamāṇāṃśukamantarīkṣe
cikṣepa cainaṃ sarasīva haṃsam||57||
pūjābhilāṣeṇa ca bāhumānyā-
ddivaukasastaṃ jagṛhuḥ praviddham|
yathāvadenaṃ divi devasaṅghā
divyairviśeṣairmahayāṃ ca cakruḥ||58||
muktvā tvalaṃkārakalatravattāṃ
śrīvipravāsaṃ śirasaśca kṛtvā|
dṛṣṭvāṃśukaṃ kāñcanahaṃsacinhaṃ
vanyaṃ sa dhīro'bhicakāṅkṣa vāsaḥ||59||
tato mṛgavyādhanapurdivaukā
bhāvaṃ viditvāsya viśuddhabhāvaḥ|
kāṣāyavastro'bhiyayau samīpaṃ
taṃ śākyarājaprabhavo'bhyuvāca||60||
śivaṃ ca kāṣāyamṛṣidhvajaste
na yujyate hiṃsramidaṃ dhanuśca|
tatsaumya yadyasti na saktiratra
mahyaṃ prayacchedamidaṃ gṛhāṇa||61||
vyādho'bravītkāmada kāmamārā-
danena viśvāsya mṛgāgnihanmi|
arthastu śakropama yadyanena
hanta pratīcchānaya śuklametat||62||
pareṇa harṣeṇa tataḥ sa vanyaṃ
jagrāha vāso'śukamutsasarja|
vyādhastu divyaṃ vapureva bibhra-
ttacchuklamādāya divaṃ jagāma||63||
tataḥ kumāraśca sa cāśvagopa-
stasmiṃstathā yāti visismiyāte|
āraṇyake vāsasi caiva bhūya-
stasminnakārṣṭā bahumānamāśu||64||
chandaṃ tataḥ sāśrumukhaṃ visṛjya
kāṣāyasaṃbhṛddhṛtikīrtibhṛtsaḥ|
yenāśramastena yayau mahātmā
saṃdhyābhrasaṃvīta ivoḍurājaḥ||65||
tatastathā bhartari rājyaniḥspṛhe
tapovanaṃ yāti vivarṇavāsasi|
bhujau samutkṣipya tataḥ sa vājibhṛd
bhṛśaṃ vicukrośa papāta ca kṣitau||66||
vilokya bhūyaśca ruroda sasvaraṃ
hayaṃ bhujābhyāmupaguhya kanthakam|
tato nirāśo vilapananmuhurmuhu-
ryayau śarīreṇa puraṃ na cetasā||67||
kvacitpradadhyau vilalāpa ca kvacit
kvacitpracaskhāla papāta ca kvacit|
ato vrajan bhaktivaśena duḥkhita-
ścacāra bavhīravaśaḥ pathi kriyāḥ||68||
iti buddhacarite mahākāvye
chandakanivartano nāma ṣaṣṭhaḥ sargaḥ||6||